Навіны

Завезці ядзернае паліва для БелАЭС плануюць да 1 кастрычніка

Завезці ядзернае паліва для Беларускай АЭС плануецца да 1 кастрычніка, паведаміў журналістам віцэ-прэзідэнт — дырэктар праекта па ўзвядзенні Беларускай атамнай электрастанцыі АТ „ІК „АСЭ” (інжынірынгавы дывізіён расейскай дзяржкарпарацыі „Расатам”) Віталь Палянін. 

Сустрэча з прадстаўнікамі СМІ адбылася 10 жніўня ў Астраўцы (Гарадзенская вобласць) у межах прэс-тура, арганізаванага з ініцыятывы „Расатама”, падраздзяленні якога будуюць БелАЭС.

„Кантрольная дата для нас і для замоўцы — 1 кастрычніка гэтага года. Усё ідзе ў адпаведнасці з графікам, узгодненым бакамі”, — заявіў Палянін.

Паводле яго слоў, першы энергаблок атамнай станцыі гатовы прыкладна на 95%, другі — на 70%. Найбліжэйшым часам, сказаў дырэктар праекта, на першым энергаблоку пачнуцца выпрабаванні рэактарнай ўстаноўкі на намінальных параметрах. „Разлічваем, што да канца гэтага года мы атрымаем дазвол, завязем паліва на пляцоўку і верым у тое, што пачнем загрузку рэактара”, — сказаў ён.

На другім энергаблоку, адзначыў Палянін, ідуць работы, звязаныя з падачай напружання на аб’ект. У канцы снежня там пачнуцца „паўнавартасныя пусканаладачныя работы”. Фізічны пуск другога энергаблока, які пачнецца з загрузкі паліва ў рэактар, плануецца ажыццявіць у наступным годзе.

Дырэктар праекта паведаміў, што на будаўніцтве абодвух блокаў БелАЭС задзейнічана 5,5 тыс. чалавек. З іх прадстаўнікоў беларускіх арганізацый ад 2 да 2,5 тыс., астатнія — расейскія рабочыя.

Беларуская АЭС узводзіцца паблізу Астраўца за кошт крэдыту Расеі паводле тыпавога расейскага праекта ВВЭР-1200. Крэдытная лінія да 10 млрд даляраў на будаўніцтва станцыі адкрытая да 2035 года. Увод у эксплуатацыю першага энергаблока БелАЭС запланаваны на снежань 2019 года, другога — на ліпень 2020-га. Мяркуецца, што атамная станцыя будзе выпрацоўваць 18 млрд кВт·гадз электраэнергіі штогод.

belapan.by

Чытай больш на: https://www.racyja.com/ekanomika/zaveztsi-yadzernae-paliva-dlya-belaes-pl/

11.08.2019
Крыніца: Беларускае Радыё Рацыя

Архіў

Лістапад 2019
123
45678910
11121314151617
18192021222324
252627282930

Відэа

праваабарончыя сайты