Навіны

Эксгумацыя адбываецца пры маўчанні з боку афіцыйнай Беларусі

8 ліпеня пачаліся раскопкі магілы Віктара Каліноўскага ў Свіслачы. Ініцыятарам раскопак выступіла Літва, дзе два гады таму былі знойдзеныя парэшткі Кастуся Каліноўскага.

Дзеля праверкі коду ДНК літоўскія ўлады звярнуліся да Беларусі з просьбай аб даследаванні парэшткаў блізкага сваяка знакамітага паўстанца.

Эксгумацыя адбываецца ў маўчанні з боку афіцыйнай Беларусі, кажа грамадcкі назіральнік Уладзімір Хільмановіч:

– Дзякуй Богу, што мы хаця б дамагліся таго, што нам паведамілі, якія будуць дзеянні адбывацца, і больш таго, абодва мы былі дапушчаныя як грамадскія назіральнікі, я і Юры Глебік, які штодзённа там прысутнічае ад пачатку да канца і мае магчымасць назіраць за гэтым працэсам. Дагэтуль, на жаль, нават цяпер на сайце Следчага камітэту Рэспублікі Беларусь я не знайшоў афіцыйнай інфармацыі. Спадзяюся, што яна неўзабаве з’явіцца. Тым больш, што працэсуальна ўсе працы праходзяць у адпаведнасці з заканадаўствам.

Дагэтуль многія з беларусаў, што хацелі ўшанаваць памяць паўстанцаў, караліся штрафамі. Уладзімір Хільмановіч спадзяецца, што сітуацыя зменіцца да лепшага:

– Былі гады, калі ўлада не замінала нам ушаноўваць паўстанцаў у Якушоўцы і Свіслачы. Я думаю, што магчыма новыя кіраўнікі, ці кіраўнікі вышэйшага рангу, якія знаходзяцца ў Менску, дадуць такі загад, каб не перашкаджалі ўшаноўваць памяць, таму што гэта не нейкія дэманстрацыі, не мітынгі, гэта проста права на гістарычную памяць, якое не патрабуе ніякіх падаванняў заявак, гэта права кожнага чалавека, кожнага народу ўшаноўваць сваіх нацыянальных герояў.

Афіцыйная Беларусь не выяўляе інтарэсу не толькі да эксгумацыі Віктара Каліноўскага, але і да перапахавання паўстанцаў. Толькі дзякуючы дзеянням беларускай грамадскай супольнасці ёсць спадзеў на тое, што на помніках нацыянальных герояў трох народаў побач з імёнамі па-літоўску ды па-польску з’явяцца надпісы па-беларуску.

Ганна Комінч, Беларускае Радыё Рацыя

Чытай больш на: https://www.racyja.com/hramadstva/eksgumatsyya-adbyvaetstsa-u-pounym-maucha/

12.07.2019
Крыніца: Беларускае Радыё Рацыя

Відэа

праваабарончыя сайты